२०८१ असार, १
||NEWS LUMBINI |

व्यापारीलाई धम्क्याएर १५ लाख माग्ने युवक फिल्मी शैलीमा पक्राउ

हार्डवेयर व्यवसायीसँग १५ लाख रुपैयाँ माग गर्दै धम्की दिने युवक प्रहरीको फन्दामा परेका छन् । व्यवसायीसँग मागेको रकम लिन आएका उनी अन्तत प्रहरीले थापेको जालोमा परे ।

घटना विवरण अनुसार ब्यास नगरपालिका ४ का भुपाल आलेलाई रिसिङ गाउँपालिका १ झापुटारका तिलबहादुर सारुले पटक पटक टेलिफोन गरी १५ लाख रुपैयाँ मागे । सारुले केही दिनदेखि लगातार टेलिफोन गरी रकम माग्ने गरिरहेका थिए ।

मेनरोडस्थित भुपाल हार्डवेयरका सञ्चालक आलेले रकम नदिएपछि सारुले शुक्रबार राति हार्डवेयर पसल अगाडि पार्किङ गरेको गाडीको सीसा पनि फुटाइदिए । दुई दिनभित्र १५ लाख रुपैयाँ नदिए पसल, गोदाम, घर र गाडी बम हानेर उडाइदिने धम्कीसमेत दिए ।

पटक पटक टेलिफोन गरी रकम मागेपछि आलेले प्रहरीलाई जानकारी गराए । प्रहरीले सारुलाई पक्राउ गर्नका लागि आलेलाई नै प्रयोग गर्‍यो ।

आलेले २ लाख रकम बुझाउने भन्दै सारुलाई व्यास नगरपालिका ३ र व्यास नगरपालिका ५ शान्तिनगर जोड्ने झोलुङ्गेपुलमा बोलाए ।

आलेलाई पठाउनुअघि पाटन र शान्ति नगरमा सादा पोशाकका प्रहरीहरु परिचालन भइसकेका थिए ।

फोन गर्ने व्यक्तिले भने बमोजिम नै आलेले पैसा भएको झोला पुल नजिकै राखी फर्किएपछि एक व्यक्ति उक्त स्थानमा गई पैसा भएको झोला टिपेर भाग्न खोज्दा नजिकै लुकेर बसेका प्रहरीले उनलाई पक्राउ गर्‍यो । पक्राउ पर्ने ब्यक्ति उनै धम्की दिने सारु थिए ।

पक्राउपछि २६ वर्षीय सारु मगरको शरीर खानतलास गर्दा प्रहरीले आलेलाई धम्क्याउन प्रयोग भएको सिमकार्ड समेत फेला पार्‍यो ।

पक्राउ परेपछि सारुले आफूले नै आलेलाई फोन गरी रकम माग्दै धम्की दिएको स्वीकार गरेको जिल्ला प्रहरी कार्यालय तनहुँका एसपी उमेशराज जोशीले बताए । प्रमाणसहित पक्राउ परेका सारु विरुद्ध अपहरण तथा शरीर बन्धक सम्बन्धी मु्द्दामा अनुसन्धान सुरु गरेको छ ।

तराईका जिल्लाहरुमा सुनिँदै आएको अपहरण तथा फिरौती माग गर्ने जस्ता अपराधिक घटना तनहुँ लगायत पाहाडी जिल्लाहरुमा पनि हुन थालेको छ ।

केही समयअघि कास्कीमा आफू मनोज पुन समूहको व्यक्ति हुँ भन्दै सांसद विन्दुकुमार थापासँग रकम माग गर्नेहरुलाई प्रहरीले पक्राउ गरेको थियो ।
-अनलाईनखबर

Facebook Comments Box

फेसबुक