झापामा ओलीको हवाई पत्रको तरंग, के भन्छन् मतदाता?

मतदाताको प्रतिक्रिया ओलीको हवाई पत्रलाई मतदाताले आश्चर्य भन्दा पनि रोचक रुपमा लिएका छन्। दमक–४ का नेत्र कार्की ओलीले पत्र मार्फत मतदातालाई आफ्नो कुरा सरल भाषामा भनेको बताउँछन्। अन्य प्रचारका रुप भन्दा यो नौलो रहेको उनले बताए। कम्तीमा साक्षर व्यक्तिहरुलाई पत्र मार्फत बाम गठबन्धनको आवश्यकता र औचित्य बुझाउने प्रयास भइरहेको भन्दै उनले तर यो नै पर्याप्त नभएको बताए। अझै पनि धेरै मतदाताको अपेक्षा ओलीले आफ्नै ठाउँमा आफै आएर भोट मागिदिउन् भन्ने रहेको उनले बताए। यस्तै कमल गाउँपालिका–६ का खेम आचार्य ओलीको हवाई पत्रले पुरानो चलनको चिठी पत्रको याद दिलाएको बताउँछन्। भाषा पनि आफै लेखेको जस्तो भएकाले यस मार्फत ओलीका धारणा बुझ्ने मौका पाएको उनले बताए।

हवाई पत्रको शुरुवात नेपाली चलनको चिठी लेखाई श्री बाट शुरु भएको छ, अनि मिति उल्लेख छ : २०७४/०७/ २५। अनि पत्र लेखन शुरु भएको छ, आदरणीय दाजु भाइ, दिदी बहिनीहरु नमस्कार। आराम रही आरामको कामना गर्दछु।

यसरी शुरु भएको पत्रमा उनले देशको पछिल्लो राजनीतिक अवस्था, संघ र प्रदेश सभाको निर्वाचनको पृष्ठभूमि दर्शाएका छन्। संविधान निर्माणको कठिनाई र चुनौती समेत दर्शाउँदै उनले वाम गठबन्धनको औचित्य पनि पुष्टि गर्न खोजेका छन्। दुइ तिहाई बढी मतदाता भए पनि वामपन्थीले सरकार बनाउन नपाएको भन्दै ५ वर्षे स्थिर सरकार गठन गर्ने भन्दै यसले वामपन्थी बिरुद्धका सबै भ्रमहरु हटाउने समेत जनाएका छन्।

कुनै पनि चुनाव चिह्न उल्लेख नगरी वामपन्थीलाई भोट दिन उनले आग्रह गरेका छन्। अन्त्यमा, उनले भनेका छन् ‘यहाँहरुलाई सबैलाई पुनः भन्न चाहन्छु, राजनीतिक स्थिरता र मुलुकको दिगो विकासका लागि बाम गठबन्धनको महाशक्तिलाई मतदान गर्नुहोस् र समृद्धिको महायात्रामा सहभागी बन्नुहोस्। यति भन्दै आजका लागि यहीँ कलम बन्द गर्दछु। बाँकी कुरा भेटमा गरौंला। धन्यवाद। उही तपाईको केपी शर्मा ओली। अनि ‘प्रिन्टेड’ हस्ताक्षर हवाई पत्रमा छ।